சிறுநீரக கல் - Kidney Stone in Tamil

சிறுநீரக கற்கள், குறிப்பாக ஆரம்ப நிலைகளில், அதிக அளவு அறிகுறிகளைக் காட்டாது. கல் நகர ஆரம்பிக்கும் போதோ அல்லது சிறுநீரக குழாய் வழியாக செல்லும் போதோ மட்டுமே அந்த வெளிப்படையான அசௌகரியம்  ஏற்பட்டு, அறிகுறிகள் தோன்ற ஆரம்பிக்கின்றன.அந்த அறிகுறிகளில் சில:

• சிறுநீர், சிகப்பு, வெளிர்சிகப்பு, அல்லது அடர் பழுப்பு நிறத்துக்கு மாற்றமடைதல்.
• அடிக்கடி சிறுநீர் கழிக்க வேண்டுமென்கிற தீவிரமான உந்துதல்.
• சிறுநீரில் ஒரு விசித்திரமான வாடை.
• ஒவ்வொரு முறையும் குறைந்த அளவே சிறுநீர் கழித்தல்.
• சிறுநீர் கழிக்கும் போது சிறுநீரகக் குழாயில் வலியை உணருதல். (மேலும் படிக்க - வலிமிகுந்த சிறுநீர் கழித்தலின் காரணங்கள்)
• குமட்டல் மற்றும் வாந்தி.
• பின் முதுகு மற்றும் பக்கவாட்டில் வலி.
• இடுப்புப் பகுதிகளில் மற்றும் அடிவயிற்றில் வலி.

வலி சிலநேரங்களில், துடிப்புகளாகவோ அல்லது அலைகளாகவோ உணரப்படும், மேலும், கல் சிறுநீரக அமைப்பில் ஒரு பகுதியில் இருந்து மற்றொரு பகுதிக்கு செல்வதால் வலி ஏற்படும் இடமும் மாறுபடலாம். கடுமையான தொடர்ச்சியான வலி, ஒரு மருத்துவ அவசர நிலை மற்றும் உடனடியாகக் கவனிக்கப்பட வேண்டியது ஆகும்.

சிறுநீரக கற்களுக்கான சிகிச்சையின் போக்கு, கல் எவ்வளவு பெரியது என்பதையும் மற்றும் அதன் பாதிப்புகளை யும் பொறுத்து வேறுபடுகிறது. பெரும்பாலான மருத்துவர்கள், பழமையான முறையான, கற்களை இயற்கையாக சிறுநீரில் வெளியேற்றும் முறைக்கு முன்னுரிமை கொடுக்கிறார்கள். சிறுநீரக கற்களுக்கு இருக்கக் கூடிய சிகிச்சை வாய்ப்புகள்:

சிறிய சிறுநீரக கற்களுக்கு

இவை நீக்குவதற்கு மிக எளிமையானவை.மருத்துவர்கள் வழக்கமாக, கற்கள் சிறுநீரில் அடித்துக் கொண்டு வெளியேறுவதற்காக,அதிக அளவு திரவ பானங்களைக் குடிக்க பரிந்துரைக்கிறார்கள்.  அவர்கள்,  இந்த செயல்முறையில் வலியைக் குறைக்க மிதமான வலிநிவாரணிகளையோ அல்லது கல் அதிக ஆற்றலுடன் வெளியேற தசைத் தளர்வு மருந்துகளையோ பரிந்துரைக்கலாம்.

பெரிய கற்களுக்கு

பெரிய சிறுநீரக கற்களுக்கு சிகிச்சை அளிக்க சில மருத்துவ நடைமுறைகள் தேவைப்படலாம்:

• மருந்துகள் கொடுத்தல்
  மருந்துகள் கொடுப்பது, உருவாகி இருக்கும் கல்லின் தன்மையையும், அந்த நிலையின் தீவிரத்தையும் பொறுத்து பரிந்துரைக்கப்படும். இந்த மருந்துகள் கல்லில் உள்ள உப்பைக் கரைக்கவும், அதன் அளவைக் குறைக்கவும் உதவுகின்றன. ஒரு காலகட்டத்திற்கு மேல், அந்தக் கல் சிறுநீரில் எளிதாக வெளியேறும் அளவிற்கு சிறியதாக மாறக் கூடும்.
• அறுவை சிகிச்சை
  லேப்ராஸ்கோப்கள் என அழைக்கப்படும் சிறிய தொலைநோக்குக் கருவிகளைப் பயன்படுத்தி, அதனை  பின்புறமாக சிறுநீரகங்களுக்குள் செலுத்தி, அறுவை சிகிச்சைக்கு உள்ளாகும் நபருக்கு மயக்க மருந்து கொடுத்த பிறகு, மருத்துவர்கள் அறுவை சிகிச்சை மூலம் சிறுநீரக கற்களை நீக்குகிறார்கள். இந்த வழிமுறை தோல்வழி சிறுநீரக கல் நீக்கம் என அழைக்கப்படுகிறது, மேலும் மருத்துவமனையில் அனுமதிக்கப்பட்டு, சில நாட்கள் தங்கி இருக்க வேண்டும்.
• ஸ்கோப்கள்
  இவை, கற்கள் சிறுநீரகத்திலோ அல்லது சிறுநீர்க்குழாயிலோ தங்கி விடும் போது பயன்படுத்தப்படுகின்றன. கல் இருக்குமிடத்தைக் கண்டறிய, ஒரு மெல்லிய ஒளிரும் குழாய் சிறுநீர்ப் பாதை வழியாக சிறுநீர் குழாய்க்குள் செலுத்தப்படும், பின்னர் அது நீக்கப்படும் அல்லது உடைக்கப்படும். பெரும்பாலான இந்த வகை நடைமுறைகளில், குறிப்பிட்ட பகுதிக்கு மட்டும் மயக்க மருந்து கொடுத்து, வெளிநோயாளி நடைமுறையில்  சிகிச்சை அளிக்கப்படும்.
• அதிர்வு-அலை சிகிச்சை
  அதிர்வலைகள் சிலநேரங்களில், சிறுநீரில் அடித்துக் கொண்டு வெளியே வருவதற்காக, சிறுநீரக கற்களை உடைப்பதற்கு அல்லது நொறுக்குவதற்கு  தோல் வழியாக செலுத்தப்படுகிறது. இந்த நடைமுறை ஒரு மணி நேரம் வரை நீடிக்கும், மேலும் கொஞ்சம் வலியையும் ஏற்படுத்தக் கூடும். இந்த நடைமுறையைப் பின்பற்றும் போது, சிறு காயங்கள் மற்றும் ரத்தப்போக்கு போன்ற சில அசௌகரியங்கள் ஏற்படலாம்.

மருத்துவர்கள் வழக்கமாக, அந்தக் கல்லை சேகரித்து அதன் தன்மையை அறிய பரிசோதனைக்கு அனுப்புவதைப் பரிந்துரைக்கிறார்கள். இது, அடுத்த கட்ட சிகிச்சையைத் தீர்மானிக்கவும், வாழ்க்கைமுறை அளவீடுகளைப் பின்பற்றி அவை திரும்ப உருவாகாமல் தடுக்கவும் உதவுகிறது.

வாழ்க்கைமுறை நிர்வாகம்

சிறுநீரக கற்களை பற்றிய மோசமான உண்மை என்னவென்றால், அவை திரும்ப வருவதற்கான வாய்ப்புகள்  வழக்கத்திற்கு மாறாக மிக அதிகம். இதன் அர்த்தம், சிகிச்சை முக்கியமானது என்பது மட்டுமல்ல, அது எப்போது உருவானது மற்றும் அதன் பிறகான நம்முடைய தேர்வுகளும் முக்கியம் என்பதே. குணமடைந்த பிறகு, ஒரு வாழ்க்கைமுறையை நிர்வகிக்கவும், பின்பற்றவும், நீங்கள் கடைப்பிடிக்க வேண்டிய சில விஷயங்கள் இங்கே:

• அதிகமான திரவ பானங்கள், முதன்மையாக தண்ணீர் அருந்துதல்.
• முன்னர் உருவான வகையிலான சிறுநீரக கற்கள் உருவாவதற்கு காரணமாகிற, உணவுகளைத் தவிர்க்கும்படியான உணவுப் பழக்கவழக்கத்திற்கு மாறுதல்.
• உயரத்திற்கும் வயதிற்கும் ஏற்ற எடையை நிர்வகித்தல் மற்றும் பராமரித்தல்.
• இரத்தம் மற்றும் சிறுநீரில் உள்ள தாதுப் பொருட்கள் மற்றும் யூரிக் அமிலத்தின் அளவுகளைக் கண்காணிக்க தொடர்ந்த உடல்நல மற்றும் ரத்தப் பரிசோதனைகள்.
• உடல் நலத்தின் மீது அக்கறையுடன் இருத்தல் மற்றும் ஒருமுறை உங்களுக்கு சிறுநீரக கற்கள் இருந்து இருந்தால், மிகவும் எளிதாக வரக் கூடிய UTIsஐ தடுக்க சுய சுத்தத்தைப் பராமரித்தல்.