இலவங்கப்பட்டை (இலவங்கப்பட்டை) நன்மைகள், பயன்கள் மற்றும் பக்க விளைவுகள் - Cinnamon (Dalchini) Benefits, Uses and Side Effects in Tamil

கேண்டிடா என்பது, மனித உடலில் இயற்கையாகக் காணப்படுகிற ஒரு பூஞ்சை ஆகும். ஆனால், தோலின் பி.எச் அளவுகளில் ஏற்படும் ஒரு சமநிலையின்மை, கேண்டிடா ஒரு அசாதாரணமான வகையில் பரவவும் மற்றும் அதனை கேண்டிட்டியாசிஸ் என்ற ஒரு மருத்துவப் பிரச்சினையாக மாற்றுவதற்கும் காரணமாகிறது. பாரம்பரிய மேற்கத்திய மூலிகை சிகிச்சை முறையில் இலவங்கப்பட்டை, கேண்டிடா இனங்களுக்கு எதிரான அதன் பூஞ்சை எதிர்ப்பு பண்புகளுக்காக நன்றாக அறியப்பட்டு இருக்கிறது. ஆய்வுக்கூட ஆய்வுகள் இலவங்கப்பட்டை எண்ணெய், அனைத்து வகையான கேண்டிடா நோய்த்தொற்றுக்களுக்கு (கேண்டிடா- அறியப்பட்ட ஒரு பெண்ணுறுப்பு ஈஸ்ட் நோய்த்தொற்று மற்றும் ஆல்பிகன்கள் எதிர்ப்பு வகை கேண்டியா) எதிராக குறிப்பிடும்படியான பூஞ்சை எதிர்ப்பு செயல்பாடுகளைக் காட்டுகிறது என சுட்டிக் காட்டுகின்றன. இருந்தாலும், எந்த ஒரு வகை நோய்த்தொற்றுக்களுக்கும் நிவாரணம் பெற, இலவங்கப்பட்டை எண்ணெய் அல்லது இலவங்கப்பட்டையை எந்த ஒரு வடிவத்திலும் பயன்படுத்தும் முன்னர் உங்கள் மருத்துவரிடம் கலந்து ஆலோசிப்பது விரும்பத்தக்கது.

செரிமானப்பாதை மற்றும் தோல் புற்றுநோய் மீதான இலவங்கப்பட்டையின் புற்றுநோய்-எதிர்ப்பு திறனை சோதிக்க விரிவான ஆய்வுகள் மேற்கொள்ளப்பட்டு இருக்கின்றன. அந்த ஆய்வுகளில் ஒன்றில், இலவங்கப்பட்டை சாறு, புற்று நோய் செல்கள் உயிர் வாழ்வதையும் மற்றும் அவை பரவுவதையும் மிகவும் திறம்படக் குறைக்கிறது எனக் கண்டறியப்பட்டு இருக்கிறது. தோல் புற்றுநோய் செல்களின் மீது நடத்தப்பட்ட மற்றொரு ஆய்வு, இலவங்கப்பட்டை, மனிதர்களுக்கு ஏற்படும் தோல் புற்றுநோயைப் பரப்புகின்ற பொறுப்பையுடைய, புரோயோஜியோஜெனிக் காரணியை (உடலில் உள்ள ஒரு உயிரிவேதிப் பொருள்) குறைக்கிறது என சுட்டிக் காட்டுகிறது. அந்த ஆய்வு மேலும், இலவங்கப்பட்டை, உடலில் தோன்றும் அந்நிய செல்களைக் கண்டறிந்து கொல்லும் பொறுப்புடைய, ஒரு வகை எதிர்மங்களான சி.டி.8 டி செல்களைத் தூண்டுகிறது எனத் தெரிவிக்கிறது. அதனால் வருங்காலத்தில், இலவங்கப்பட்டை, புற்றுநோய் எதிர்ப்பு சிகிச்சையில் ஒரு ஆற்றலைக் கொண்டிருக்கலாம்.

(மேலும் படிக்க: புற்றுநோய் வகைகள் மற்றும் சிகிச்சை)

வாய் துர்நாற்றம் என்பது ஒரு வெறுக்கப்படும் பிரச்சினை மற்றும் சில நேரங்களில் சமாளிக்கக் கடினமான ஒரு பிரச்சினை ஆகும். மருத்துவர்களின் கருத்துப் படி, வாய் துர்நாற்றத்துக்கு மிகவும் பொதுவான காரணம், பற்களின் குழிகளில் சேரும் அதிகமான நுண்ணுயிரிகளின் அளவு ஆகும். அதிர்ஷ்டவசமாக, இலவங்கப்பட்டையில் உள்ள சின்னமிக் அமிலம், நமது வாயில் தோன்றுகிற நுண்ணுயிரிகளைக் கொல்வதில் திறன்மிக்கதாக இருக்கக் கூடும் என ஆய்வுகள் தெரிவிக்கின்றன. எனவே, போய் வா வாய் துர்நாற்றமே. கனடாவில் நடத்தப்பட்ட ஒரு ஆய்வில், இலவங்கப்பட்டை பபுள்கம் எடுத்துக் கொள்ளும் நபர்களுக்கு, சாதாரண பபுள்கம் எடுத்து கொள்ளும் நபர்களை விட. வாயில் நுண்ணுயிரிகள் தோன்றுவது குறைவாக இருப்பதாகக் கண்டறியப்பட்டு இருக்கிறது. இருந்தாலும், இலவங்கப்பட்டையின் இந்தத் திறனை உறுதி செய்வதற்கு, மேலும் பல ஆய்வுகள் செய்ய வேண்டிய தேவை இருக்கிறது.

ஆயுர்வேதத்தில், பல்வலியைப் போக்குவதற்காக கிராம்பு மற்றும் இலவங்கப்பட்டை எண்ணெய் கலந்த ஒரு கலவை பயன்படுத்தப்படுகிறது. மருத்துவ மற்றும் பல் மருத்துவ ஆராய்ச்சிக்கான நாளேட்டில் வெளியிடப்பட்ட ஒரு ஆய்வுக் கட்டுரையின் படி, இலவங்கப்பட்டை, பல் ஈறு வீக்கத்துக்கு (நோய்த்தொற்றுக்கு உள்ளான ஈறுகளைக் கொண்டு குறிக்கப்படுகிற ஒரு பிரச்சினை) நிவாரணம் அளிப்பதில் மிகவும் திறன்மிக்கதாகும். அந்த ஆய்வு மேலும், இலவங்கப்பட்டையின் ஈறு வீக்கத்துக்கு எதிரான திறன், இந்தப் பிரச்சினைக்கு நிவாரணம் அளிக்கப் பயன்படுத்தப்படும் வழக்கமான மருந்தான குளோரக்ஸிடன் திறனுக்கு சமமாக இருப்பதாகத் தெரிவிக்கிறது.

இலவங்கப்பட்டை, பெண்களுக்கு ஏற்படும் மாதவிடாய் பிரச்சினைகளோடு இணைந்த, மாதவிடாய் கால தசைப்பிடிப்புகள், குமட்டல் மற்றும் வாந்திக்கான சிகிச்சைக்காக, ஆயுர்வேதத்தில் மற்றும் மூலிகை மருத்துவத்தில் நீண்ட காலமாக பயன்படுத்தப்பட்டு வருகிறது. சமீபத்தில், ஒரே மாதவிடாய் கால வயதுள்ள 76 பெண்களைக் கொண்ட ஒரு குழுவில் நடத்தப்பட்டஒரு ஆய்வில், ஒரு நாளைக்கு மூன்று முறை இலவங்கப்பட்டை மாத்திரைகளை (420 மி.கி) எடுத்துக் கொள்வது, பெண்களுக்கு ஏற்படும் தசைப்பிடிப்புகள், உதிரப்போக்கு, குமட்டல் மற்றும் வாந்தியைக் குறைப்பதில் திறன்மிக்கதாக இருப்பதாகக் கண்டறியப்பட்டு உள்ளது.

ஆயுர்வேதத்தில், இலவங்கப்பட்டை, உடலில் உள்ள கபம் மற்றும் வாதத்தைக் குறைத்து, பித்தத்தை அதிகரிப்பதாக அறியப்படுகிறது. இதனால், அது உடலில் உள்ள கபத்தை நீர்த்துப் போகச் செய்து அதனை கிரகிக்கவும் செய்கிறது. இலவங்கப்பட்டை எண்ணெய்யின் ஒரு மூலக்கூறான சின்னமிக் அமிலம், மனிதர்களுக்கு ஏற்படும் காசநோய் உருவாவதற்கு காரணமான காரணியான, மைக்கோபாக்டீரியம் டியூபர்குளோசிஸ்ஸைக் கொல்வதில் செயல்திறன் மிக்கதாக இருக்கக் கூடும் என ஆய்வுகள் தெரிவிக்கின்றன. இருப்பினும், இந்த நுண்ணுயிருக்கு எதிரான சின்னமிக் அமிலத்தின் சரியான செயல்பாடு மற்றும் செயல்முறையைத் தீர்மானிக்க, மேலும் பல ஆய்வுகள் இப்போதும் தேவைப்படுகின்றன. மேலும் இலவங்கப்பட்டை, ஒரு வெப்பமூட்டும் விளைவைக் கொண்டிருக்கிறது. எனவே அது, ஜலதோஷத்துக்கு ஒரு நிவாரணியாக பாரம்பரிய மூலிகை சிகிச்சை முறை மற்றும் பாரம்பரிய சீன மருத்துவத்தில் பயன்படுத்தப்படுகிறது.

இலவங்கப்பட்டையின் ஆக்சிஜனேற்ற எதிர்ப்பு மற்றும் அழற்சி எதிர்ப்பு பண்புகள், அதனை சருமத்துக்கு ஒரு சிறந்த உணவாக ஆக்குகின்றன. இந்தப் பண்புகள் இணைந்து முகப்பரு போன்ற சருமப் பிரச்சினைகளுக்கான வாய்ப்புக்களைக் குறைப்பதோடு மட்டும் அல்லாமல், கூடவே சுருக்கங்கள், கரும்புள்ளிகள் மற்றும் மற்ற முதுமை தொடர்பான சரும அறிகுறிகள் ஏற்படுவதைத் தாமதப்படுத்தவும் உதவுகிறது. இலவங்கப்பட்டை ஒரு திறன்மிக்க அழற்சி எதிர்ப்பு பொருளாக இருந்தாலும், அது அதன் சொந்தமான ஊட்டமளிக்கும் பண்புகள் எதையும் கொண்டிருக்கவில்லை. ஆகவே, பாரம்பரிய மூலிகை சிகிச்சை முறையானது, முகப்பருவை ஆற்றவும் மற்றும் சருமத்துக்கு ஒரு ஊட்டமான பளபளப்பைக் கொடுக்கவும், இலவங்கப்பட்டையும் தேனும் கலந்து ஒரு கலவையாகப் பயன்படுத்துகிறது.

உடலின் செயல்பாட்டுக்கு முறையான இரத்த சுழற்சி அவசியமானதாகும். குறிப்பிட்ட உடல் அல்லது உடலியல் பிரச்சினைகள், இரத்தக் குழாய்களில் இரத்தம் உறைவதன் மூலம் முறையற்ற இரத்த சுழற்சிக்கு வழிவகுக்கக் கூடும். மருத்துவர்களின் கருத்துப் படி, இலவங்கப்பட்டையில் உள்ள கவ்மரின் (ஒரு உயிரிவேதியியல் காரணி), ஒரு இயற்கையான இரத்த மெலிதாக்கி மற்றும் ஒரு உறைவு எதிர்ப்பி (இரத்தம் உறைதலைத் தடுக்கிறது) ஆகும். இலவங்கப்பட்டையை உட்கொள்வது, இரத்தம் உறையும் அபாயம் ஏற்படுவதைக் குறைப்பதுடன், நமது உடலில் இரத்த சுழற்சியையும் அதிகரிக்கக் கூடும். இருப்பினும், கவ்மரினை அதிக அளவில் எடுத்துக் கொள்வது கல்லீரலுக்கு தீங்கு விளைவிக்கக் கூடும். எனவே இலவங்கப்பட்டையை எடுத்துக் கொள்ளும் முன்னர், உங்கள் மருத்துவரிடம் ஆலோசிப்பது அறிவுறுத்தப்படுகிறது.

பாரம்பரிய மூலிகை சிகிச்சை முறை, இலவங்கப்பட்டையை ஒரு மிகச் சிறந்த கொழுப்பு அளவைக் குறைக்கும் காரணியாகக் கருதுகிறது. பல ஆய்வுகளில், இலவங்கப்பட்டை, உடலின் குறை-அடர்த்தி லிப்போபுரோட்டீன் அல்லது கெட்ட கொழுப்பைக் குறைப்பதில் உதவிகரமாக இருக்கிற அதே வேளையில் அது, உடலில் உள்ள உயர்-அடர்த்தி லிப்போபுரோட்டீன் (நல்ல கொழுப்பு) அளவுகளைத் திறம்பட அதிகரிக்கிறது எனத் தெரிவிக்கப்பட்டு இருக்கிறது. இருந்தாலும், கொழுப்பு அளவைக் குறைக்கும் செயலின் சரியான நடைமுறை அல்லது அதற்கு பொறுப்பான உட்கூறு பற்றி கண்டறியப்படவில்லை. இது, நேரடியாக இதய ஆரோக்கியத்தை மேம்படுத்த உதவவில்லை என்றாலும் கூட, இலவங்கப்பட்டை, உடலில்  உயர் கொழுப்பு அளவுகள் பரவுவதோடு இணைந்து இருக்கிற, பொதுவான இதயப் பிரச்சினைகள் வருவதற்கான அபாயத்தைக் குறைக்கக் கூடும்.

இலவங்கப்பட்டையின் நுண்ணுயிர் எதிர்ப்பு விளைவுகளை சோதிக்க எண்ணற்ற ஆய்வுகள் நடத்தப்பட்டு இருக்கின்றன. அவை, இலவங்கப்பட்டை ஒரு திறன்மிக்க நுண்ணுயிர் எதிர்ப்புக் காரணி எனத் தெரிவிக்கின்றன. இலவங்கப்பட்டையில் இருக்கின்ற ஒரு அத்தியாவசியமான மூலக்கூறான சின்னமல்டீஹைட், அனைத்து வகை நுண்ணுயிர், பூஞ்சை, ஒட்டுண்ணிகளைக் கொல்வதில் மிகவும் சக்தி வாய்ந்தது என ஆராய்ச்சி சுட்டிக் காட்டுகிறது. மேலும் அது, பேன்களின் (பெடிகுலஸ் ஹ்யுமனஸ் காபிடிஸ்) முட்டைகள் மற்றும் வளர்ந்த பேன்களுக்கு எதிராகத் திறன்வாய்ந்தது எனவும் நம்பப்படுகிறது. பொதுவான நுண்ணுயிர் நோய்த்தொற்றுக்களுக்கு சிகிச்சை அளிப்பதில், இலவங்கப்பட்டையின் சரியான செயல்படும் முறை மற்றும் பயனை அறிந்து கொள்ள, மேலும் விரிவான ஆய்வுகள் நடத்தப்பட்டுக் கொண்டு இருக்கின்றன.

இலவங்கப்பட்டை, உடல் எடைக்குறைப்புக்கான மிகவும் பிரபலமான பாரம்பரிய தீர்வுகளில் ஒன்று ஆகும். சமீப காலத்துக்கு முன்பு வரை, உடல் எடைக் குறைப்புக்கும் இலவங்கப்பட்டைக்கும் இடையேயான ஒரு நேரடித் தொடர்பை உருவாக்கக் கூடிய, அறிவியல்பூர்வ ஆதாரங்கள் எதுவும் இல்லை. ஆனால், வாழ்வியல் அறிவியலின் மிக்சிகன் பல்கலைக்கழகத்தில் நடத்தப்பட்ட சமீபத்திய ஆய்வு ஒன்று, இலவங்கப்பட்டையின் ஒரு மூலக்கூறான சின்னமல்டீஹைட்டால், கொழுப்புகளை திறம்பட எரிக்க முடியும் எனத் தெரிவிக்கிறது. இந்த ஆராய்ச்சியின் படி, சின்னமல்டீஹைட், உடலில் வெப்பத்தை உருவாக்கி, சக்திக்காக கொழுப்புத் திசுக்களை ( கொழுப்பு செல்கள்) அதிக கொழுப்புகளை எரிக்கச் செய்ய காரணமாக இருக்கிறது. ஆய்வகத்தில் மற்றும் விலங்குகள் மீது நடத்தப்பட்ட ஆய்வுகள், இலவங்கப்பட்டையை எடுத்துக் கொள்வது செரிமான செயல்முறையைத் தாமதப்படுத்தி, உங்களை நீண்ட நேரத்துக்கு வயிறு நிரம்பியிருப்பது போன்று உணரச் செய்கிறது என சுட்டிக் காட்டுகின்றன. எனவே, உடல் எடைக் குறைப்புத் திட்டத்தில் பிற்சேர்க்கைப் பொருளாக இலவங்கப்பட்டையை சேர்ப்பது, அதன் நன்மைகளைக் கொண்டிருக்கக் கூடும். இருப்பினும், இலவங்கப்பட்டையை எடுத்துக் கொள்ளும் முன்னரும் மற்றும் இலவங்கப்பட்டையைத் தேவைக்கு அதிகமாக எடுத்துக் கொண்டால், கல்லீரலில் நச்சுத்தன்மையை அதிகரிக்கக் கூடும் என்பதால், எடுத்துக் கொள்ள வேண்டிய சரியான அளவைத் தெரிந்து கொள்ளவும், உங்கள் மருத்துவரிடம் ஆலோசிப்பது நல்லது. 

(மேலும் படிக்க: உடல் எடைக் குறைப்பு உணவுப்பழக்க அட்டவணை)

நச்சுத்தன்மை அழுத்தம், நீரிழிவு ஏற்படுவதற்கான காரணங்களில், ஒரு முக்கியமான குற்றவாளி என ஆய்வுகள் தெரிவிக்கின்றன. மேலும் நச்சுத்தன்மை அழுத்தத்துக்கு எதிரான சிறந்த பாதுகாப்பு என்பது ஆக்சிஜனேற்ற எதிர்ப்பிகள் போன்ற, எதிர்வினை ஆக்சிஜன் இனங்களை நீக்கி, மூலக்கூறு சேதாரம் ஏற்படும் அபாயங்களைப் போக்குகின்ற, அடிப்படை மூலக்கூறுகள் தான் என நம்பப்படுகிறது. ஒரு ஆக்சிஜனேற்ற எதிர்ப்பியாக இலவங்கப்பட்டை, நீரிழிவு நோயுடன் வாழ்பவர்களுக்கு ஒரு வரப்பிரசாதத்துக்கு கொஞ்சமும் குறைவானது கிடையாது. உண்மையில் இது, நறுமணப் பொருட்களின் உலகத்தில் கிராம்புக்கு அடுத்தபடியாக செறிவான ஆக்சிஜனேற்ற எதிர்ப்பிகளைக் கொண்ட ஆதாரம் ஆகும். நீரிழிவு நோயுடன் இருக்கும் 500 நபர்களிடம் நடத்தப்பட்ட ஒரு ஆய்வில், அவர்களுக்கு 4-18 வாரங்கள் கால அளவுக்கு, ஒவ்வொரு நாளுக்கும் 6கி இலவங்கப்பட்டை வழங்கப்பட்டது, பிறகு, தொடர்ச்சியாக இலவங்கப்பட்டை உட்கொள்வது, உணவுக்கு முந்திய இரத்த சர்க்கரை அளவுகளைக் குறிப்பிடத்தக்க வகையில் குறைக்கிறது எனக் கண்டறியப்பட்டது. மற்றொரு ஆய்வு, 5கி அளவில் இலவங்கப்பட்டை எடுத்துக் கொள்வது, இன்சுலின் உணர்திறனை அதிகரிக்கிறது மற்றும் இந்த ஹார்மோன், இரத்தத்தில் இருந்து அதிக சர்க்கரையை எடுத்துக் கொள்வதற்கு காரணமாக இருக்கின்றது எனக் கூறுகிறது. இலவங்கப்பட்டையின் சர்க்கரைக்குறைப்பு (இரத்த சர்க்கரை அளவைக் குறைத்தல்) விளைவுகள், அதனை உண்மையில் எடுத்துக் கொண்ட 12 மணி நேரத்துக்குப் பின்னர், செயல்திறன் மிக்கதாக இருப்பது கவனிக்கப்பட்டது. கூடுதலாக, மெத்திலிஹைட்ராக்சிசால்கோன் என்ற ஒரு வேதியியல் சேர்மம், இன்சுலின் ஹார்மோன் போன்று திறம்பட செயல்பட்டு, உடலில் இரத்த சர்க்கரை அளவுகளைக் குறைப்பதில் உதவுகிறது.

இலவங்கப்பட்டை, அனைத்து வகை இரைப்பை பிரச்சினைக்கும், சிறந்த நிவாரணமாக இல்லாமல் இருக்கலாம். ஆனால், வயிற்றின் ஆரோக்கியத்துக்கும் மற்றும் வயிறு நலமாக இருப்பதற்கும் பயன்படுத்தப்பட்டு இருக்கிற, ஒரு நீண்ட வரலாறை அது கொண்டிருக்கிறது. பாரம்பரிய மேற்கத்திய மூலிகை சிகிச்சை முறை, இலவங்கப்பட்டையை, ஒரு இரைப்பை வலிநீக்கி மற்றும், ஒரு வயிற்று வலிநீக்கி என அழைக்கிறது. இரைப்பை வலிநீக்கி என்பது, வயிற்றுப் பொருமலை (வயிறு வீக்கம்) சமாளிக்க உதவுகிற வேளையில், வயிற்று வலிநீக்கியானது உணவை எளிதாக செரிமானம் ஆக்குவதன் மூலம், பசியுணர்வை மேம்படுத்துகிற ஒரு மூலிகை ஆகும். மேலும், இலவங்கப்பட்டையில் இருக்கின்ற கேட்டசின்கள், குமட்டலைப் போக்க உதவிகரமா இருப்பதாக அறியப்பட்டு உள்ளது. குமட்டல் அறிகுறிகளில் இருந்து விடுபட, இலவங்கப்பட்டை பொதுவாக தேநீர் வடிவில் பயன்படுத்தப்படுகிறது. இயற்கை மருத்துவத்தில் இலவங்கப்பட்டை, ஒரு மலமிளக்கியாகப் (மலச்சிக்கலை நீக்குகிறது)  பயன்படுத்தப்படுகிறது. ஆயுர்வேதத்தில் இலவங்கப்பட்டை, வயிற்றுப் பிடிப்புகள், வயிற்றுப்போக்கு மற்றும் பெருங்குடல் அழற்சி போன்றவற்றுக்கு சிகிச்சை அளிக்கப் பயன்படுத்தப்படுகிறது. அஜீரணத்துக்கு (செரிமானமின்மை) சிகிச்சையளிப்பதில் இலவங்கப்பட்டையின் செயல்திறனை பரிசோதனைக்கூட ஆய்வுகள் தெரிவிக்கின்றன. தொடர்ந்த ஆய்வுகள், இலவங்கப்பட்டை தயிர், வயிற்றுப் புண்ணுக்கு மிகவும் வழக்கமான காரணமான, ஹெலிகோபாக்டெர் பைலோரி நுண்ணுயிரியை எதிர்க்க மிகவும் பயனுள்ளது எனத் தெரிவிக்கின்றன. இருந்தாலும், இந்த நறுமணப் பொருளின் அனைத்து பாரம்பரிய பயன்களையும் உறுதிப்படுத்த, இன்னும் பல ஆய்வுகள் தேவைப்படுகின்றன. எனவே உங்கள் மருத்துவரிடம் ஆலோசிப்பது நல்லது.