அக்ரூட் நன்மைகள், பயன்கள் மற்றும் பக்க விளைவுகள் - Walnuts Benefits, Uses and Side effects in Tamil

அக்ரூட்டுகள், நமது மூளைக்கான ஒரு சிறப்பான உணவு ஆகும். ஆராய்ச்சி சான்றுகள், அக்ரூட்டுகளை உட்கொள்வது, உங்கள் மூளையின் ஆரோக்கியத்தைப் பராமரிக்கவும் மற்றும் முதுமை தொடர்பான நரம்பு சிதைவு பிரச்சினை உங்களை நெருங்காமல் காக்கவும் உதவுகிறது என்று தெரிவிக்கின்றன. உங்கள் மூளைக்கு அக்ரூட்டுகள் அளிக்கின்ற, அறிவியல்ரீதியாக நிரூபணமான நன்மைகளைப் பற்றி, நாம் இப்பொழுது ஒரு பார்வை பார்க்கலாம்.

• அவை, மூளையின் செல் கட்டுமானம் மற்றும் செயல்பாட்டினைப் பராமரிக்க மிகவும் முக்கியமானவையான பன்மை செறிவுறா கொழுப்பு அமிலங்கள், டி.எச்.ஏ. மற்றும் ஏ.எல்.ஏ. ஆகியவற்றை செறிவாகக் கொண்டிருக்கிறது .கூடவே அவை, மூளையில் ஏற்படுகின்ற ஆக்சிஜனேற்ற நச்சுத்தன்மையைக் குறைத்து, அதன் மூலம் அறிவாற்றல் மற்றும் நினைவாற்றலை அதிகரிக்கிறது.
• அக்ரூட்டுகளில் இருக்கின்ற பாலிபெனோல்கள், உங்கள் நினைவாற்றல் செயல்பாட்டினை வலிமையாக வைத்திருக்க உதவுகின்றன.
• மெலடோனின் என்பது, அக்ரூட்டுகளில் காணப்படும் மற்றும் ஒரு மூலக்கூறு ஆகும். அவை, பகல் இரவு சுழற்சியைப் பராமரிக்க முக்கியமானவை ஆகும். அதாவது, அக்ரூட்டுகளை உண்பது, ஒரு நல்ல இரவு உறக்கத்தை நீங்கள் பெற, உதவக் கூடியது ஆகும்.
• பார்க்கின்ஸன் மற்றும் அல்சைமர் நோய்கள், உலகம் முழுக்க மிகவும் வழக்கமான நரம்பு சிதைவு குறைபாடுகள் ஆகும். ஆராய்ச்சியின் அடிப்படையில், அக்ரூட்டுகளைத் தொடர்ந்து உட்கொண்டு வருவதன் மூலம், இந்த நரம்பு சிதைவு நோய்கள் ஏற்படாமல் தடுக்க இயலும் என்று தெரிவிக்கப்பட்டு உள்ளது. உங்கள் உணவுப் பழக்கத்தில் அக்ரூட்டுகளை சேர்த்துக் கொள்வது, அழற்சி, உள்மூலக்கூறு சேதாரம் மற்றும் அதனால் ஏற்படும் முதுமை தொடர்பான மூளை கோளாறுகள் ஆகியவற்றில் இருந்து உங்கள் மூளையைப் பாதுகாக்கக் கூடியது ஆகும்.
• விலங்குகள் மீது நடத்தப்பட்ட ஆய்வுகள், அக்ரூட்டுகளை உட்கொள்வது, உடலின் சில சமிஞ்கை பாதைகளை மறித்து, கை கால் வலிப்பு மற்றும் வலிப்பு ஏற்படும் அபாயத்தைக் குறைக்கக் கூடும் என்று சுட்டிக் காட்டுகின்றன.

அக்ரூட்டுகள், அதிக அளவில் கொழுப்புச்சத்தை கொண்டவையாக இருந்தாலும், அவற்றை மிதமான அளவில் எடுத்துக் கொண்டால், அவை உங்களுக்கு உடல் எடையைக் குறைக்க உதவக் கூடியவை ஆகும். ஒரு கை நிறைய அக்ரூட்டுகள் (ஏறத்தாழ 12 முதல் 14 வரை), நீண்ட நேரத்துக்கு, உங்களை வயிறு நிரம்பி இருப்பது போன்று உணரச் செய்ய போதுமானவை ஆகும். இது, உங்கள் பசியைக் கட்டுப்படுத்த சிறப்பாக உதவுகின்ற புரதம் மற்றும் நார்ச்சத்து உட்பொருட்கள் அதிக அளவில் இருப்பதன் காரணமாக நடைபெறுகிறது. ஒரு கட்டுப்படுத்தப்பட்ட ஆய்வில், உடல் பருமன் உள்ள 10 நபர்கள், 48 கி அக்ரூட்டுகளைக் கொண்டு தயாரிக்கப்பட்ட ஒரு பானத்தை அருந்தினர். தொடர்ந்து 5 நாட்களுக்கு, தினமும் ஒரு முறை அந்த பானத்தை அருந்திய பிறகு, அவர்களின் பசியுணர்வு, அதே அளவு ஊட்டச்சத்துக்கள் மற்றும் கலோரிகளைக் கொண்ட மற்ற பானங்களைக் குடித்த நபர்களின் பசியுணர்வோடு ஒப்பிடும் பொழுது, மிகவும் குறைந்து காணப்பட்டது.

மேலும் அவை, உங்கள் உடலின் அதிகப்படியான எடையில் பங்கெடுத்து கொண்டிருக்கும் ஒரு காரணியாக இருக்கக் கூடிய கெட்ட கொழுப்புகளின் அளவை, உங்கள் உடலில் இருந்து உண்மையிலேயே குறைக்கின்ற பன்மை செறிவுறா கொழுப்புகளைக் கொண்டிருக்கின்றன.

ஆக்சிஜனேற்ற எதிர்ப்பிகளின் களஞ்சியமாக இருப்பதால் அவை, உள்மூலக்கூறு சேதாரத்தைக் கட்டுப்பாட்டில் வைக்கின்றன. அதன் மூலம், வளர்சிதை மாற்ற செயல்பாடுகளை மேம்படுத்தி, விரைவாக உடல் எடையைக் கரைக்க உங்களுக்கு உதவுகின்றன.

(மேலும் படிக்க: உடல் பருமன் சிகிச்சை)

அக்ரூட்டுகள், நார்ச்சத்துக்களின் ஒரு சிறந்த ஆதாரம் ஆகும். இதற்கு அர்த்தம் அவை, உங்கள் குடல் அமைப்புக்கு பொருத்தமான உணவு என்பதாகும். சொல்லப் போனால், நார்ச்சத்து நிறைந்த உணவு, உங்கள் குடல் ஆரோக்கியத்துக்கு அற்புதத்தை நிகழ்த்தும் என்று ஆய்வுகள் தெரிவிக்கின்றன. அவை உங்கள் உணவுக்கு திரட்சியைக் கொடுத்து, உங்கள் பசியுணர்வுக்கு கடிவாளம் போடுகிற அதே வேளையில், மலச்சிக்கல் ஏற்படாமல் தடுக்கவும் உதவுகின்றன.

இது மட்டும் அல்லாமல் அவை, உங்கள் குடல் பகுதியின் நுண்ணுயிர் தொகுதியை மேம்படுத்தவும் செய்கிறது. 194 ஆரோக்கியமான வயது வந்த பெரியவர்கள், தினசரி 43 கிராம்கள் அக்ரூட்டுகள் எடுத்துக் கொண்டனர். எட்டு வாரங்களுக்குப் பிறகு, தினசரி 43 கிராம்கள் அக்ரூட்டுகள் உட்கொள்வது, ஆரோக்கியமான ப்ரோபையோட்டிக் நுண்ணயிரியின் உற்பத்தியை அதிகரிக்கிறது என்று கண்டறியப்பட்டது. இந்த நுண்ணுயிரி, உடலில் செரிமானத்திற்கு உதவி செய்கிறது மற்றும் கொழுப்பு வளர்சிதை மாற்ற செயல்பாட்டினை மேம்படுத்துகிறது.

மற்றொரு ஆய்வு அவை, எண்ணெய்ப்பசை -உற்பத்தி செய்யும் நுண்ணியிரியை அதிகரித்து, அதன் மூலம் குடல் ஆரோக்கியத்தை அதிகரித்து ஊட்டமளிக்கின்றன என்பதை வெளிப்படுத்தியது.   

ஆய்வு சான்று, அக்ரூட்டுகளை உட்கொள்வதற்கும், நீரிழிவு ஏற்படும் அபாயம் குறைவதற்கும் உள்ள தொடர்பை சுட்டிக் காட்டுகிறது. ஏனென்றால் அக்ரூட், இரத்தத்தில் சர்க்கரை மிகை, அல்லது நீரிழிவுக்குக் காரணமான அனைத்து அபாய காரணிகளுக்கும் எதிராக செயல்படுகிறது.

உடல் பருமனைக் கொண்ட நபர்கள், நீரழிவு அல்லது உயர் இரத்த சர்க்கரை நோய் ஏற்படும் அபாயத்தில் உள்ளனர். ஆய்வுகளின் அடிப்படையில் பருப்புகள், உணவுசார் நார்ச்சத்து மற்றும் புரதம் ஆகியவற்றை அதிக அளவில் கொண்டு இருக்கின்றன. மருத்துவரீதியான ஆய்வுகள், மிதமான அளவில் அக்ரூட்டுகளை உட்கொள்வது, உங்கள் பி.எம்.ஐ -யுடன் கூடவே, உங்கள் உடலில் உள்ள கொழுப்பு அளவுகளைப் பராமரிக்கவும் உதவுகிறது என்று தெரிவிக்கின்றன. இந்தக் காரணிகள் இணைந்து, உணவுப் பழக்கத்தை மேம்படுத்தி, நீரிழிவு ஏற்படாமல் தடுக்க உதவுகின்றன.

இவற்றிற்கும் மேலாக அக்ரூட்டுகள், தாதுக்கள், வைட்டமின்கள், ஆக்சிஜனேற்ற எதிர்ப்பிகள், மற்றும் பைட்டோடெரோல்களை செறிவாகக் கொண்டிருக்கின்றன. இவை, அவற்றின் ஆக்சிஜனேற்ற எதிர்ப்பு செயல்பாடு மற்றும் உள்மூலக்கூறு சேதாரக் கூறுகளை நீக்கும் செயல்பாடு ஆகியவற்றின் மூலம், நீரிழிவு ஏற்படாமல் தடுக்க அல்லது ஏற்படுவதைத் தாமதப்படுத்த உதவக் கூடியவை ஆகும். 

நீரிழிவு/வளர்சிதை மாற்றம் பற்றிய ஆராய்ச்சி மற்றும் ஆய்வுகள் நாளேட்டில் வெளியிடப்பட்ட ஒரு சமீபத்திய ஆய்வின் படி, தொடர்ச்சியாக அக்ரூட் எடுத்துக் கொள்ளும் நீரிழிவுக்கு முந்திய நிலையில் உள்ள நபர்களுக்கு, அக்ரூட் எடுத்துக் கொள்ளாத நபர்களோடு ஒப்பிடும் பொழுது, நீரிழிவாக மாறும் அபாயம் மிகவும் குறைவாக இருக்கிறது.

அக்ரூட்டுகள், மற்ற வழக்கமான பருப்புகளோடு ஒப்பிடும் பொழுது, ஆக்சிஜனேற்ற எதிர்ப்பிகளின் செறிவான ஆதாரமாக நிரூபிக்கப்பட்டு இருக்கிறது. உணவு மற்றும் செயல்பாடு நாளேட்டில் வெளியிடப்பட்ட ஒரு ஆய்வுக் கட்டுரையில், அக்ரூட்டுகள், உங்கள் உணவில் நீங்கள் சேர்த்துக் கொள்ளக் கூடிய, சிறந்த ஆக்சிஜனேற்ற எதிர்ப்பு உணவு என்று குறிப்பிடப்படுகிறது. இதற்கு அர்த்தம், அக்ரூட்டுகள் எந்த ஒரு ஆக்சிஜனேற்ற சேதத்தை எதிர்த்துப் போராடவும் மற்றும் நோய்களை உங்களை விட்டு தூரத்தில் தள்ளி வைக்கவும் உதவுகின்றன என்பதாகும்.

(மேலும் படிக்க: ஆக்சிஜனேற்ற எதிர்ப்பிகள் செறிவான உணவுகள்)

உங்கள் தினசரி உணவில் அக்ரூட்டுகளை சேர்த்துக் கொள்வது, விந்து மற்றும் விந்தணுக்கள் உற்பத்தியை அதிகரிக்க உங்களுக்கு உதவக் கூடியது ஆகும். அதன் மூலம், ஆரோக்கியமான ஆண்களுக்கு கரு உண்டாகும் திறனை அதிகரிக்கிறது.

117 ஆரோக்கியமான ஆண்களை உள்ளடக்கிய ஒரு கட்டுப்படுத்தப்பட்ட ஆய்வில், தொடர்ந்து 75 கிராம் அளவுக்கு அக்ரூட்டுகளை எடுத்துத் கொள்வது, 3 மாதங்களுக்குள் விந்தணு வடிவம், நகரும் தன்மை மற்றும் ஆற்றலை அதிகரிப்பதில் திறன்மிக்கதாக இருப்பது கண்டறியப்பட்டது.

அடுத்தகட்ட ஆய்வுகள் இந்த விளைவு, அக்ரூட்டுகளில் இருக்கின்ற, இந்த ஆண்களின் பாலுறவு பிரச்சினைகள் ஏற்படக் காரணமான முக்கிய காரணியான ஆக்சிஜனேற்ற சேதாரத்தைக் குறைக்கின்ற, ஆக்சிஜனேற்ற எதிர்ப்பிகளின் காரணமாக ஏற்படுகின்றன என்று சுட்டிக் காட்டுகின்றன.

இன்றைய நாட்களில், நவீன வாழ்க்கைமுறை மற்றும் ஆரோக்கியமற்ற உணவுப் பழக்கங்களினால் ஏற்படும், உயர் இரத்த அழுத்தம் என்பது மிகவும் பொதுவான ஒரு பிரச்சினையாக மாறிக் கொண்டு வருகிறது. அது, உங்களின் தினசரி வாழ்க்கையை பாதிப்பது மட்டும் அல்ல, உங்களுக்கு இதய நோய்கள் ஏற்படும் அபாயத்தையும் அதிகரிக்கிறது. அக்ரூட்டுகள், உங்கள் உணவுப் பழக்கத்தின் ஒரு ஆரோக்கியமான பகுதியை ஏற்படுத்த, ஊட்டச்சத்துக்கள் மற்றும் தாதுக்களின் நல்ல ஒரு ஆதாரமாக இருக்கின்றன. அவை, உங்களை குறைவாக சாப்பிட வைப்பதன் மூலம், நீங்கள் ஆரோக்கியமற்ற சிற்றுண்டிகளை அளவுக்கு அதிகமாக உண்ணாமல் இருப்பதை உறுதி செய்கின்றன.

ஊட்டச்சத்துக்கான அமெரிக்க கல்லூரியின் நாளேட்டில் வெளியிடப்பட்ட ஒரு ஆராய்ச்சியின் படி, உங்கள் உணவுப் பழக்கத்தில் அக்ரூட்டுகளை சேர்த்துக் கொள்வது, மன அழுத்தத்தை சமாளிக்க உங்களுக்கு உதவுக் கூடும். இந்தப் பருப்புகள், நீங்கள் ஓய்வில் இருக்கும் பொழுதும், அதே போன்று மன அழுத்தத்தில் இருக்கும் பொழுதும் உங்கள் இரத்த அழுத்தத்தின் மீது ஆதிக்கம் செலுத்துகின்ற, பன்மை செறிவற்ற கொழுப்புகளைக் கொண்டிருக்கின்றன.

ஆகவே, நீங்க உயர் இரத்த அழுத்தத்தினால் பாதிக்கப்பட்டு இருந்தால், உங்கள் தினசரி உணவில் ஒரு கை நிறைய அக்ரூட்டுகளை சேர்த்துக் கொள்வது, நல்ல ஆரோக்கியத்துக்காக எடுத்து வைக்கப்படும் சரியான அடியாக இருக்கலாம்.

முதுமை அடைவதில் இருந்து யாரும் தப்ப முடியாது. ஆனால், மெதுவாக மற்றும் ஒரு ஆரோக்கியமான முறையில் முதுமை அடைவதில் உதவக் கூடிய, சில ஆரோக்கியமான பழக்கங்களை எப்போதும் நாம் பின்பற்ற முடியும். நமது தினசரி உணவில் அக்ரூட்டுகளை சேர்த்துக் கொள்வது, நமது உடலியல் திறனைப் பராமரிக்கவும் மற்றும் நேர்த்தியாக முதுமை அடையவும் உதவக் கூடியது ஆகும். நாம் முதுமை அடையும் பொழுது, நமக்கு ஆற்றல் குறைவான, ஆனால் ஊட்டச்சத்து அதிகம் உள்ள உணவு தேவைப்படுகிறது. ஒரு ஆய்வின் படி, முதியவர்கள் ஒரு நாளைக்கு 43 கி அக்ரூட்டுகள் எடுத்துக் கொள்வது, அதிக அளவில் தாவரம் சார்ந்த புரதச்சத்து உள்ளே எடுத்துக் கொள்ளப்படுவது, மொத்த கார்போஹைட்ரேட்டு, மிருக புரதச்சத்து, மற்றும் சோடியம் குறைவாக எடுத்துக் கொள்ளப்படுவது ஆகிய விளைவுகளுக்கு காரணமாக இருக்கிறது. மேலும், நமக்கு வயதாகும் பொழுது, ஊட்டச்சத்துக்களை நமது உடல் கிரகிப்பது குறைகிறது. ஆனால், அக்ரூட்டுகளை எடுத்துக் கொள்வது, ஊட்டச்சத்துக்களை கிரகிப்பதில் சாதகமான மாற்றங்களுக்குக் காரணமாகிறது, முதுமைப் பருவத்திலும், உங்கள் ஆரோக்கியத்தை மறுபடியும் அடைய உதவுகிறது.   

நீண்ட காலமாகப் புற்றுநோய், மரபுவழி மரபணு மாற்றத்தின் ஒரு விளைவாக ஏற்படுகிறது என நம்பப்பட்டது. ஆனால், 1981 ஆம் ஆண்டில், புற்றுநோய், வாழ்க்கைமுறை மற்றும் பிற சுற்றுச்சூழல் காரணிகளாலும் கூட ஏற்படக் கூடியது என டால் மற்றும் பெட்ரோ அவர்களால் தெரிவிக்கப்பட்டது. மேலும், குறிப்பிட்ட வகை புற்றுநோய்கள் ஏற்படுவதில் மற்றும் தடுப்பதில், உணவுப் பழக்கம் ஒரு முக்கியமான பங்கு வகிக்கிறது.

ஓர் ஆராய்ச்சியின் அடிப்படையில் அக்ரூட்டுகள், ஒமேகா 3-கொழுப்பு அமிலங்கள், β-சிட்டோஸ்டெரோல், டோக்கோபெரால்கள், மற்றும் பெடுன்குலாஜின் என அழைக்கப்படும் குறிப்பிட்ட உயிரிவேதிப் பொருட்கள் நிறைந்தவையாக இருப்பதால், அவை திடமான புற்றுநோய் எதிர்ப்பு பண்புகளைக் கொண்டிருக்கின்றன. தொடர்ச்சியாக அக்ரூட்டுகளை உட்கொண்டு வருவதால், நோய் எதிர்ப்பு அமைப்பு வலிமையடைகிறது, இறுதியில் அது புற்றுநோய் செல்கள் உருவாவதைத் தடுக்கிறது.

அடுத்தகட்ட ஆய்வுகள், அக்ரூட்டுகளைத் தொடர்ந்து உட்கொண்டு வருவது, குடல் அமைப்பில் உள்ள நுண்ணுயிரிகளிடையே ஒரு சாதகமான மாற்றங்களுக்குக் காரணமாவதன் மூலம் பெருங்குடல் புற்றுநோய் ஏற்படுவதைத் தடுக்கிறது என சுட்டிக் காட்டுகின்றன. அக்ரூட்டுகள் முதியவர்களுக்கு, ப்ரோஸ்டேட் சுரப்பி புற்றுநோய்க்குக் காரணமான உயிரிபொருளான டோக்கோபெரால் அளவுகளை சமன்படுத்துவதன் மூலம், ப்ரோஸ்டேட் சுரப்பி புற்றுநோய் ஏற்படும் அபாயத்தைக் குறைக்கிறது.